វាជាពេលវេលាដ៏រំភើប ដែលអ្នកកំពុងចាប់ផ្តើមធ្វើអាជីវកម្មមួយ។ យើងមានឧបករណ៍ និងពត៌មានជំនួយខ្លីៗសម្រាប់អ្នក មិនថាជាពេលដែលអ្នកគ្រាន់តែទើបសម្រេចចិត្តលើគម្រូអាជីវកម្មរបស់អ្នក ឬក៏អ្នកចង់បង្កើតផែនការអាជីវកម្មណាមួយសម្រាប់ក្រុមហ៊ុនអ្នក។
ពិនិត្យមើលផែនការអាជីវកម្មខាងក្រោមនេះ ដែលរៀបចំដោយក្រុមហ៊ុនផលិតអាវយឺត ដើម្បីជាមគ្គុទ្ទេសក៍នាំផ្លូវអ្នកក្នុងការរៀបចំផែនការអាជីវកម្មផ្ទាល់ខ្លួនរបស់អ្នក។
ផែនការអាជីវកម្ម ករណីសិក្សារបស់ចរិយា
ចរិយាមានអាជីវកម្ម លក់អាវយឺតដែលគូរដោយដៃ និងដោយផ្តិតពុម្ពក្រណាត់សូត្រ។ នាងបានធ្វើអាជីវកម្មក្នុងឧស្សាហកម្មសម្លៀកបំពាក់អស់រយៈពេលជាង១៥ឆ្នាំ។ នាងបានចាប់ផ្តើមធ្វើអាជីវកម្មនៅក្នុងផ្ទះរបស់នាងតាំងពីឆ្នាំ ២០០០ ដោយដេរអាវយឺតជាមួយម៉ាស៊ីនដេរចាស់មួយដែលបន្សល់ទុកពីម្តាយនាង។ ផែនការជំនួញរបស់ចរិយាមានដូចខាងក្រោម៖
១. គោលបំណងនៃការធ្វើអាជីវកម្ម
តើអាជីវកម្មធ្វើអ្វីខ្លះ?
អាជីវកម្មរបស់ខ្ញុំផលិតចេញនូវ អាវយឺតដែលគូរដោយដៃ និងដោយផ្តិតពុម្ព។ វាត្រូវបានលក់រាយដល់អតិថិជនម្នាក់ៗ និងអ្នកបោះដុំក្នុងឯកសណ្ឋានដូចគ្នាសម្រាប់សមាគម និងអាជីវករមួយចំនួន។
២. គោលដៅនៃការធ្វើអាជីវកម្ម
តើអ្នកចង់អោយវាដំណើរការដល់ណាក្នុងរយៈពេល៥ឆ្នាំ? ចូរពិភាក្សានៅទីនេះនូវអ្វីដែលត្រូវធ្វើដូចជា៖ ទំហំនៃការលក់ដែលអ្នករំពឹងថានឹងមាន ចំនួនបុគ្គលិកដែលអ្នកត្រូវការ ផលិតផលដែលអ្នកត្រូវធ្វើ ចំនួនឯកតានានាដែលអ្នកចង់លក់ និងទីតាំងធ្វើជំនួញរបស់អ្នក ជាដើម ។ល។
ខ្ញុំមានផែនការចង់ពង្រីកអាជីវកម្មខ្ញុំអោយឈានដល់ ១.២៥០.០០០ ដុល្លារក្នុងការលក់ប្រចាំឆ្នាំក្នុងរយៈពេល៥ឆ្នាំ ជាមួយបុគ្គលិកចំនួន១៥នាក់ (៦នាក់ជាអ្នកគូរ និងបោះពុម្ព ៦នាក់ជាជាងកាត់ដេរ និង៣នាក់ទៀតជាសហការីលក់)។ ខ្ញុំនឹងបង្កើតខ្សែផលិតផលអាវយឺតយ៉ាងហោចណាស់៦កន្លែង ។ ដោយសន្មត់ថាផ្នែកលក់រាយនៃអាជីវកម្មធ្វើបានល្អ អាជីវកម្មអាចជួលកន្លែងនៅក្បែរទីប្រជុំជននៃទីក្រុង។ ខ្ញុំក៏នឹងធ្វើតេស្តសាកល្បងខ្សែផលិតផលថ្មីៗដូចជាសំពត់ស្ត្រី និងសំណុំអាវឈុត។
៣. ផលិតផល និងសេវាកម្ម
ពិពណ៌នាពីផលិតផល និងសេវាកម្មចម្បងៗរបស់អ្នក។ តើអ្វីខ្លះជាលក្ខណៈពិសេសរបស់ផលិតផល និងសេវាកម្មរបស់អ្នក? តើអ្វីខ្លះជាតម្លៃមធ្យមនៃផលិតផល ឬសេវាកម្មនិមួយៗ?
ខ្ញុំលក់ផលិតផលអាវយឺត ទាំងលក់រាយ និងបោះដុំ។ ខ្ញុំមានការរចនាជា៥ម៉ូដស្តង់ដារ ដែលត្រូវបានគូរ ឬផ្តិតពុម្ព ទៅលើផ្នែកខាងមុខនៃអាវយឺតពណ៌ស ឬអាវពណ៌។ ខ្ញុំខ្ញុំក៏អាចបង្កើតអាវយឺតដែលបានរចនាឡើងតាមបំណងសម្រាប់ការបញ្ជាទិញឯកជនណាមួយ។ ធ្វើបែបនេះវាទាមទារតម្លៃខ្ពស់ខ្លាំង ក៏ព្រោះតែថ្លៃពលកម្មខ្ពស់ដែរ។ អាវយឺតដែលបោះពុម្ពដោយប្រើពុម្ពក្រណាត់សូត្រ ត្រូវបានលក់ជាចម្បងទៅសមាគមផ្សេងៗ ឬអាជីវករ ជាលក្ខណៈឯកសណ្ឋាន។
៤. ឧស្សាហកម្ម
ពិពណ៌នានូវប្រភេទឧស្សាហម្មដែលអ្នកធ្វើ (ដូចជា ម្ហូបអាហារ សម្លៀកបំពាក់ ការលក់រាយ និងផលិតកម្ម ជាដើម ។ល។)
ខ្ញុំស្ថិតនៅក្នុងជំនាញប្រភេទឧស្សាហកម្មសម្លៀកបំពាក់ពិសេស៖ សម្លៀកបំពាក់គឺជាឧស្សាហកម្ម ដ៏ពិបាកមួយដែលយើងចង់ធ្វើ ពីព្រោះដើម្បីអោយមានការបញ្ជាទិញ សម្លៀកបំពាក់ត្រូវតែជាម៉ូដទាន់សម័យ ហើយម៉ូដសម្លៀកបំពាក់ផ្លាស់ប្តូរជារៀងរាល់ឆ្នាំ។ ទោះជាយ៉ាងណាក្តីសម្លៀកបំពាក់ក៏ជាឧស្សាហកម្មមួយដែលល្អក្នុងការធ្វើអាជិវកម្មដែរ ព្រោះវាជាតម្រូវការចាំបាច់មូលដ្ឋានរបស់មនុស្សគ្រប់រូប។ បន្ថែមលើនេះ ខ្ញុំក៏ជាផ្នែកមួយនៃឧស្សាហកម្ម ដែលធ្វើឯកសណ្ឋានផ្សេងៗ។ ឯកសណ្ឋានរបស់ខ្ញុំ ផ្គត់ផ្គង់ទៅអាជីវករខ្នាតតូច និងមធ្យម ឬការិយាល័យវិស័យសាធារណៈខ្នាតតូច និងសាលារៀន។
តើឧស្សាហកម្មរបស់អ្នកមានការរីកចម្រើន ឬថយចុះ? សូមពន្យល់
ទោះបីជាឧស្សាហកម្មសម្លៀកបំពាក់ថយចុះក៏ព្រោះវិបត្តិហិរញ្ញវត្ថុ និងមានការនាំចូលពីប្រទេសចិនក្តី តែដោយលក្ខណៈពិសេសរបស់ខ្ញុំ និងជំនាញពិសេសពីឧស្សាហកម្មសម្លៀកបំពាក់ ខ្ញុំជឿជាក់ថាមានការរីកចម្រើន។ ខ្ញុំផលិតអាវយឺតដោយមានរចនាម៉ូដពេញនិយម ជាម៉ូដដែលមានតែមួយគត់ និងមិនមានលក់នៅទីផ្សារក្នុងស្រុក។ ជាមួយនឹងសេដ្ឋកិច្ចមានការងើបឡើងវិញបន្តិចម្តងៗ វាក៏មានចំណូលដែលអាចសន្សំបានក្រោយការចំណាយ ហេតុនេះអតិថិជនដែលភាគច្រើនជាស្ត្រី ក៏មានការចំណាយលើសម្លៀកបំពាក់កាន់តែច្រើន។ ឧស្សាហកម្មឯកសណ្ឋានគឺមានស្ថេរភាព ហើយជាពិសេស អាជីវករចង់ឱ្យមានការរចនាឯកសណ្ឋាន ខុសៗគ្នា ដើម្បីចែកចំណាត់ថ្នាក់ពួកគេឱ្យដាច់ដោយឡែកពីអាជីវករផ្សេងទៀត។
តើអ្វីខ្លះជាឧបសគ្គសំខាន់ៗនៅក្នុងឧស្សាហកម្មនេះ?
ការរចនាម៉ូដដោយប្រព័ន្ធកុំព្យូទ័រមានលក្ខណៈសម្បូរបែប ជាមួយកំព្យូទ័រ ការរចនាជាច្រើនត្រូវបានតម្រូវតាមបំណង និងដាក់បញ្ចូលទៅក្នុងអាវយឺត មួក និងក្រណាត់ទ្រនាប់ ជាដើម។ ការបោះពុម្ពដោយប្រើពុម្ពក្រណាត់សូត្រវាមានការចំណាយតិច និងប្រើពេលវេលាតិចតួច ប៉ុន្តែវាតម្រូវឱ្យមានឧបករណ៍សមស្របដែលនឹងអនុញ្ញាតឱ្យផលិតសំលៀកបំពាក់ច្រើនប្រភេទក្នុងពេលតែមួយ។ ដើម្បីរក្សាការប្រកួតប្រជែងខ្ញុំនឹងត្រូវវិនិយោគជាចុងក្រោយលើគ្រឿងម៉ាស៊ីនបន្ថែម។
៥. ទីផ្សារ និងការប្រកួតប្រជែង
ក. អតិថិជន
តើអតិថិជនរបស់អ្នកមានទីតាំងនៅកន្លែងណា? (ជាអ្នកជិតខាងរបស់អ្នក នៅក្នុងទីក្រុង/ទីប្រជុំជន ជាក្រុមសាសនា ជាជាតិសាសន៍របស់អ្នក ឬជាប្រជាជាតិសកល)
អតិថិជនរបស់ខ្ញុំភាគច្រើនគឺជាអ្នកមកទីក្រុងធំៗ និងពីទីប្រជុំជនជិតខាង។
ប្រសិនបើអតិថិជនរបស់អ្នកជាលក្ខណៈបុគ្គល (ផ្ទុយពីអាជីវកម្ម) ចូរពិពណ៌នាពីពួកគេក្នុងកម្រិតនៃអាយុពួកគេ ជាបុរសឬស្ត្រី អ្នកចំណូលថ្មី ឬ ជាជាតិសាសន៍ភាគតិច ជាដើម។ល។ ប្រសិនបើពួកគេជាអ្នកជំនួញ ពិពណ៌នាពីភាពជាក់លាក់នៃអតិថិជន អាជីវកម្ម (ទីកន្លែង បរិមាណលក់ ឧស្សាហកម្ម ជាដើម។
ខ្ញុំមានអតិថិជន៣ប្រភេទខុសគ្នា៖
- ជាលក្ខណៈបុគ្គល ភាគច្រើនជាស្ត្រីដែលមានអាយុចាប់ពី២០ ឆ្នាំទៅ ៤០ឆ្នាំ ដែលមក ហាងដើម្បីស្វែងរក អាវយឺតគូរ/លាប ដោយដៃ
- ជាក្រុម សមាគម ឬអាជីវករ ដែលមករកទិញអាវយឺតគូរ/លាបពណ៌ដោយដៃ ឬដែលបោះពុម្ពដោយប្រើពុម្ពក្រណាត់សូត្រ ចំនួន១០ ឬច្រើនជាងនេះ ជាមួយការរចនាម៉ូដដូចគ្នា សម្រាប់ព្រឹត្តិការសំខាន់ៗ ឬ ជាឯកសណ្ឋានពាណិជ្ជកម្មណាមួយ និង
- ហាងលក់សម្លៀកបំពាក់ពីរបីដែលខ្ញុំលក់អាវយឺតអោយនូវប្រភេទអាវយឺតគូរដោយដៃ ដែលជាអ្នកលក់រាយទៅអតិថិជនចុងក្រោយ។
តើនរណាជាអតិថិជនធំជាងគេរបស់អ្នក?
បច្ចប្បន្ននេះ ខ្ញុំមានអតិថិជនជាលក្ខណៈបុគ្គលច្រើននាក់ និងអាជីវករមូលដ្ឋាន ជាអតិថិជនចម្បងរបស់ខ្ញុំ។ ការបញ្ជាទិញច្រើនជាងគេបំផុតរបស់ខ្ញុំគឺមកពី សហគ្រាសផលិត ក្រដាស ដែលបានបញ្ជាទិញអាវយឺតបោះពុម្ពដោយផ្តិតពុម្ពក្រណាត់សូត្រសម្រាប់បុគ្គលិក របស់ពួកគេ។ ខ្ញុំបានលក់អោយទៅតែហាងសម្លៀកបំពាក់ ម៉ាបែលក្នុងរយៈពេល៤ខែចុងក្រោយនេះ ហើយតម្រូវការគឺកើនឡើង។ ពួកគេអាចជាអ្នកទិញទំនិញធំមួយទៅអនាគត។
តើមានចំនួនប៉ុន្មានភាគរយ (%) នៃការលក់សរុបរបស់អ្នក តំណាងឱ្យអតិថិជនកំពូល ៥នាក់របស់អ្នក? តើអ្នកពឹងផ្អែកលើអតិថិជន៥នាក់នេះដូចម្តេច?
ខ្ញុំមានអតិថិជនច្រើនខុសគ្នា។ អតិថិជនធំជាងគេរបស់ខ្ញុំគឺ សហគ្រាសផលិតក្រដាស ដែលគាំទ្រ ១០% នៃការលក់របស់ខ្ញុំនៅក្នុងត្រីមាសទី១ ឆ្នាំ ២០០៦។
តើអាជីវកម្មរបស់អ្នកជាប្រភេទ តាមរដូវកាល ឬរង្វិលជុំ?
ជំនួញរបស់ខ្ញុំអាចចាត់ថាជាប្រភេទរដូវកាល ហើយខុសគ្នាទៅតាមប្រភេទអតិថិជន។ ខ្ញុំមានការលក់កម្រិតខ្ពស់សម្រាប់អតិថិជនទូទៅ និងពីហាងលក់សម្លៀកបំពាក់ មែបេល ក្នុងកំឡុងខែវិច្ឆិកា និងខែធ្នូ ក្នុងការរៀបចំសម្រាប់រដូវកាលគ្រីស្តម៉ាស។ ការលក់ទៅអោយក្រុម និងសមាគមគឺរក្សាកម្រិតឋេរពេញមួយឆ្នាំ ប៉ុន្តែមានការលក់បានតិចតួចនៅការចាប់ផ្តើមដំបូងនៃឆ្នាំសិក្សា គឺកំឡុងខែកញ្ញា និងតុលា។ ការលក់មានកម្រិតទាបនៅរដូវក្តៅក្នុងខែមិថុនា និងកក្កដា។
តើអតិថិជនអ្នកដែលជាអតិថិជនដដែលៗមានប៉ុន្មានភាគរយ
មាន២០%នៃអតិថិជនម្នាក់ៗ តំណាងអោយអតិថិជនដដែលៗ។
តើមានប៉ុន្មានភាគរយជាអតិថិជនដែលដើរចូលទិញ
មានតែ៥%ប៉ុណ្ណោះនៃអតិថិជនម្នាក់ៗ ដែលបានដើរចូលទិញ ដោយហេតុថាខ្ញុំពុំមានទីតាំងសម្រាប់តាំងបង្ហាញបានល្អ។ ភាគច្រើននៃអតិថិជនប្រភេទនេះដែលមកទីតាំងអាជីវកម្មរបស់ខ្ញុំ ព្រោះតែបានឮអំពីខ្ញុំពីមុន។ ពួកគេភាគច្រើនមកដាក់ស្នើការបញ្ជាទិញ។
ខ. ការប្រកួតប្រជែង និងអត្ថប្រយោជន៍ពីការប្រកួតប្រជែង
តើនរណាខ្លះកំពុងបម្រើសេវាកម្មទៅប្រភេទអតិថិជនដូចអ្នក ជាមួយនឹងផលិតផល និងសេវាកម្មស្រដៀងគ្នា? (សូមស្រង់ឈ្មោះដៃគូប្រកួតប្រជែង និងផលិតផលដែលគេបានផ្តល់)
ក្រុមហ៊ុនផ្គត់ផ្គង់ឯកសណ្ឋាន ហាងលក់អាវយឺតទេសចរណ៍ ក្រុមរចនាម៉ូដអាវយឺត និងហាងលក់សម្លៀកបំពាក់ ចូចូ ។ ក្រុមទាំងនេះផ្តល់អោយនូវការរចនាម៉ូដបែបទំនៀមទម្លាប់ សម្រាប់ការបញ្ជាទិញជាក្រុម និងផ្ទាល់ខ្លួន។ ក្រុមរចនាម៉ូដអាវយឺត T-Shirt Designs ធ្វើការបោះពុម្ពដោយប្រើពុម្ពក្រណាត់សូត្រ និងចាក់ប៉ាក់ដោយប្រើម៉ាស៊ីនកំព្យូទ័រ។ ក្រុមហ៊ុនផ្គត់ផ្គង់ឯកសណ្ឋាន Uniform Supply Company បម្រើដល់អាជីវកម្ម និងផលិតឯកសណ្ឋានរួមទាំងអាវយឺតជាមួយនឹងស្លាកសញ្ញាអាជីវកម្ម។
តើអ្នកឃោសនាអាជីវកម្មរបស់អ្នកទៅអតិថិជនដូចម្តេច ដើម្បីបង្ហាញថាផលិតផល និងសេវាកម្មរបស់អ្នកមានភាពខុសគ្នា ឬប្រសើរជាងដៃគូប្រជែងរបស់អ្នក?
ខ្ញុំផ្សាយឃោសនាផលិតផលរបស់ខ្ញុំតាមបុគ្គលម្នាក់ៗជាមូលដ្ឋាន។ ខ្ញុំធ្វើទស្សនកិច្ចទៅទីតាំង អាជីវកម្មចំនួន៣កន្លែង ដោយចំណាយពេលមួយថ្ងៃក្នុងមួយសប្តាហ៍ដើម្បីឃោសនាពីអាជីវកម្មអាវយឺតរបស់ខ្ញុំ។ ភាគច្រើននៃអតិថិជនរបស់ខ្ញុំម្នាក់ៗ ខ្ញុំទាញការចាប់អារម្មណ៍របស់ពួកគេតាមរយៈពាក្យសម្តីផ្ទាល់មាត់។ ភាគច្រើនពួកគេគឺជានិយោជិករបស់ក្រុមហ៊ុនអាជីវកម្មដែលខ្ញុំបានលក់អាវជូនទៅ។ ក្នុងកំឡុងពេលដែលខ្ញុំធ្វើការឃោសនាខ្ញុំតែងតែពាក់អាវយឺតដែលជាផលិតផលរបស់ខ្ញុំ ដូចនេះខ្ញុំអាចបង្ហាញដល់ពួកគេនូវគុណភាពសម្ភារៈ និងពណ៌នាលម្អិតពីការរចនា។
តើទីផ្សារផលិតផល និងសេវាកម្មរដៃគូប្រកួតប្រជែងរបស់អ្នកដូចម្តេចដែរ? តើតម្លៃរបស់ពួកគេដូចគ្នា ឬថ្លៃជាងអ្នក?
ផលិតផលរបស់ខ្ញុំគឺផ្តល់ជូនតម្រូវតាមបំណងផ្ទាល់ខ្លួន សម្រាប់តម្រូវការរបស់អតិថិជននីមួយៗ ដូច្នេះវាមានការលំបាកក្នុងការប្រៀបធៀបវាជាមួយអាជីវកម្មផ្សេងទៀត។ ទោះជាយ៉ាងណាក៏ដោយសម្រាប់លក្ខណៈពិសេសនៃអាវយឺតដ៏ស្រស់បំព្រងរបស់ខ្ញុំមានតម្លៃសមល្មមជាងអ្វីដែលអ្នកបានរកឃើញនៅក្នុងហាងទំនើប។ វាមានតម្លៃថ្លៃជាងអាវរបស់អ្នកទេសចរទូទៅចន្លោះពី ១ ដុល្លារទៅ ៥ ដុល្លារ។ ខ្ញុំមានការប្រកួតប្រជែងពីរប្រភេទគឺ ហាងទេសចរណ៍ និងក្រុមហ៊ុនផលិតឯកសណ្ឋាន។
តើគូប្រជែងរបស់អ្នកផ្តល់ផលប្រយោជន៍អ្វីខ្លះ ដែលអ្នកមិនបានធ្វើ?
គូប្រកួតប្រជែងរបស់ខ្ញុំអាចផលិតបានបរិមាណច្រើនជាងអ្វីដែលខ្ញុំអាចធ្វើបាន និងគ្រប់គ្រងការបញ្ជាទិញធំជាងខ្ញុំ។
តើអ្វីខ្លះជាគុណសម្បត្តិដែលអាជីវកម្មរបស់អ្នកមានប្រៀបលើគូប្រជែងរបស់អ្នក (បុគ្គលិក ផ្នែកទីផ្សារ ភាពរឹងមាំខាងហិរញ្ញវត្ថុ)?
ភាពរឹងមាំដ៏ធំបំផុតរបស់ខ្ញុំគឺជាឯកលក្ខណភាព នៃផលិតផលរបស់ខ្ញុំ ។ ភាពរឹងមាំទីពីរគឺថាខ្ញុំមានការចំណាយថ្លៃប្រតិបតិ្តការទាបដោយសារតែខ្ញុំធ្វើអាជីវកម្មនៅផ្ទះរបស់ខ្ញុំ ដែលអាចរក្សាតម្លៃ និងថ្លៃចំណាយរបស់ខ្ញុំក្នុងកម្រិតសមស្រប។
តើអ្វីខ្លះជាភាពទន់ខ្សោយនៃអាជីវកម្មរបស់អ្នកធៀបនឹងដៃគូប្រកួតប្រជែងរបស់អ្នក?
ទំហំខ្នាតតូចនៃអាជីវកម្មរបស់ខ្ញុំគឺជាភាពទន់ខ្សោយធំបំផុតរបស់ខ្ញុំ។ ប្រសិនបើខ្ញុំមានសមត្ថភាពបន្ថែមទៀត (ទំហំទីតាំង គ្រឿងម៉ាស៊ីន និងបុគ្គលិក) នោះខ្ញុំនឹងអាចផលិត និងលក់អាវយឺតបានច្រើន។ ដៃគូប្រកួតប្រជែងរបស់ខ្ញុំជាទូទៅមានទីតាំងល្អប្រសើរងាយស្រួលចូលដល់ជាងខ្ញុំ។ ប្រសិនបើខ្ញុំមានសំយ៉ាបខាងមុខហាងនៅក្នុងទីតាំងសំខាន់ ខ្ញុំនឹងអាចបង្កើនចំនួននៃអតិថិជនដើរចូលទិញបានច្រើន។ ហាងលក់អាវយឺតផ្សេងៗទៀតមានទីតាំងនៅកណ្តាលប្រជុំជន។
