៤ជំហានដើម្បីទទួលជោគជ័យ

ក្លាយជាអ្នកផ្គត់ផ្គង់របស់វិស័យសាធារណៈ ឬស្ថាប័នឯកជន

អត្ថបទនេះពន្យល់អំពីជំហាន៤យ៉ាង ក្នុងការចូលរួមក្នុងដំណើរការកិច្ចលទ្ធកម្មដោយជោគជ័យ។

ជំហានទី ១. រៀបចំផែនការ និងត្រៀមលក្ខណៈដើម្បីធ្វើការដេញថ្លៃ

ការរៀបចំផែនការទុកជាមុនគឺមានសារៈសំខាន់ដើម្បីទទួលបានភាពជោគជ័យ: សូមចងចាំថាពេលវេលាដើម្បីឆ្លើយនឹងការស្នើសុំការដេញថ្លៃគឺមានដែនកំណត់ខ្លាំង ហើយនៅពេលដែលការដេញថ្លៃត្រូវបានប្រកាសផ្សាយ វាអាចយឺតពេលសំរាប់អ្នកដើម្បីឆ្លើយតប។

មុនពេលប្រកាសផ្សាយពត៌មាននៃការដេញថ្លៃ ទាំងអ្នកទិញ និងអ្នកផ្គត់ផ្គង់មានកិច្ចការជាច្រើនដែលត្រូវធ្វើ។ ខណៈពេលដែលអង្គការសាធារណៈ និងវិស័យឯកជនមានគម្រោងអ្វីមួយដែលត្រូវទិញ តម្រូវការដូចម្តេច នៅពេលណា និងជាមួយនឹងធនធានអ្វីខ្លះនោះ អ្នកត្រូវធ្វើការស្រាវជ្រាវទីផ្សារ និងសកម្មភាពពង្រីកអាជីវកម្មដើម្បីស្វែងយល់ពីអ្វីដែលជាតម្រូវការអតិថិជនសក្តានុពលរបស់អ្នក និងអ្វីដែលពួកគេនឹងត្រូវទិញនាពេលអនាគត។

ឱកាសនៃការទទួលបានកិច្ចសន្យាមានកំរិតខ្ពស់ ប្រសិនបើអ្នកធ្វើដូចការណែនាំខាងក្រោម ពីការផ្សាយសេចក្តីជូនដំណឹងដេញថ្លៃមួយ:

• ធ្វើការស្រាវជ្រាវឲ្យទូលំទូលាយអំពីទីផ្សារ
• កសាងទំនាក់ទំនងជាមួយអតិថិជនសក្តានុពលរបស់អ្នក និងដឹងពីតម្រូវការ និងផែនការទិញរបស់ពួកគេ
• រៀបចំសម្ភារៈស្តង់ដារចាំបាច់ដើម្បីដាក់ស្នើសំណើរ ឬការផ្តល់ជូន
• ហ្វឹកហាត់បុគ្គលិករបស់អ្នកអំពីរបៀបសរសេរសំណើ
• ស្វែងយល់ពីកិច្ចសហការប្រកបដោយសក្តានុពលជាមួយក្រុមហ៊ុនផ្សេងទៀត ដូច្នេះប្រសិនបើអ្នកត្រូវការ អ្នកដឹងថាអ្នកអាចធ្វើជាដៃគូរនៅពេលដែលមានឱកាសកើតឡើង។

ជំហានទី ២. រៀបចំ និងដាក់ស្នើសំណើរបស់អ្នក

ការផ្តល់ជូនសំណើរបស់អ្នកគឺជាឱកាសរបស់អ្នក ដើម្បីបង្ហាញពីក្រុមហ៊ុនរបស់អ្នកហើយបញ្ចុះបញ្ចូលអ្នកទិញថាដំណោះស្រាយរបស់អ្នក (ជាទំនិញ ការងារ ឬសេវាកម្ម) គឺល្អបំផុតនៅលើទីផ្សារដើម្បីបំពេញតម្រូវការរបស់ពួកគេ។

ការរៀបចំការផ្តល់ជូនសំណើគឺជាដំណើរការសិក្សា។ ការរៀបចំការសំណើជាលើកដំបូង (ឬសម្រាប់អតិថិជនថ្មី) អាចមានភាពស្មុគស្មាញ មានតម្លៃថ្លៃ និងប្រើពេលវេលាច្រើន ហើយវាមិនគួរអោយភ្ញាក់ផ្អើលទេ ដែលក្រុមហ៊ុនមានការខកចិត្តនៅពេលដែលការដេញថ្លៃមិនត្រូវបានផ្តល់ឱ្យពួកគេ។ រាល់ការដេញថ្លៃមានភាពខុសគ្នា ហើយវាមានសារៈសំខាន់ខ្លាំងណាស់ ដែលអ្នកត្រូវពិនិត្យមើលឯកសារដេញថ្លៃយ៉ាងយកចិត្តទុកដាក់ និងធ្វើតាមការណែនាំ។ ជារឿយៗ ក្រុមហ៊ុនមានកំហុសឆ្គងតិតួចហើយត្រូវបានដកហូតសិទ្ធិពីក្នុងដំណើរការលទ្ធកម្មដោយសារតែមិនបានអនុលោមទៅតាមតម្រូវការសេចក្តីស្នើនៃការដេញថ្លៃ។

ត្រូវចងចាំថាគោលដៅចុងក្រោយនៃការដាក់ស្នើសំណើ គឺដើម្បីឈ្នះ និងទទួលបាននូវកិច្ចសន្យាមួយ។ ថ្លែងពីអ្វីដែលធ្វើឱ្យអ្នកមានឯកលក្ខណៈភាព និងអត្ថប្រយោជន៍នៃការធ្វើការជាមួយអ្នក។ ក្នុងឱកាសជាច្រើន អ្នកដេញថ្លៃមិនបង្ហាញនៅក្នុងការផ្តល់ជូនរបស់ពួកគេនូវការយល់ដឹងពីវិសាលភាពនៃការងារ និងតម្រូវការរបស់អតិថិជនទេ ហើយអ្វីដែលពួកគេស្នើគឺនៅឆ្ងាយពីអ្វីដែលអតិថិជនពិតជាចង់បាន។ នេះហើយជាមូលហេតុដ៏សំខាន់ដែលអ្នកត្រូវដឹងពីអតិថិជនរបស់អ្នកកាន់តែច្បាស់។ ចូរអានឯកសារដេញថ្លៃឱ្យបានច្រើនដង ប្រសិនបើចាំបាច់ហើយពិភាក្សាអំពីការដេញថ្លៃ ជាមួយអ្នកផ្សេងទៀតក្នុងក្រុមហ៊ុនរបស់អ្នកដែលស្គាល់អតិថិជននោះ ហើយធ្វើការជាក្រុមនៅពេលរៀបចំសំណើ។ កុំសន្មតថាអ្នកវាយតំលៃទាំងអស់សុទ្ធ តែជាអ្នកជំនាញលើគ្រប់ប្រធានបទនោះ។ ត្រូវប្រាកដថាសំណើរបស់អ្នកគឺច្បាស់លាស់ ជាប់ទាក់ទង និងមានភាពទាក់ទាញ។

ជំហានទី ៣. ការផ្តល់ជូនទាន់ពេលវេលា ថវិកា និងវិសាលភាព

អបអរសាទរ! អ្នកបានឈ្នះកិច្ចសន្យា។ ឥឡូវនេះការប្រឈមដ៏លំបាកបំផុតចាប់ផ្តើម: អនុវត្ត និងបញ្ចប់ការចែកចាយផ្គត់ផ្គង់របស់អ្នក ឬគម្រោងបានទទួលជោគជ័យ។ សូមចងចាំថាការពេញចិត្តរបស់អតិថិជន និងការបំពេញការងារបានល្អគឺជាមធ្យោបាយដ៏ល្អបំផុតដើម្បីធានាកិច្ចសន្យានាពេលអនាគត។ ត្រូវប្រាកដថាអ្នកផ្គត់ផ្គង់បានទាន់ពេលវេលា តាមខ្ទង់ថវិកា និងស្របតាមគុណភាពដែលរំពឹងទុកដោយអតិថិជន។ អ្នកផ្គត់ផ្គង់ដែលមិនបានបំពេញតាមកាតព្វកិច្ចនៃកិច្ចសន្យារបស់ពួកគេ អាចនឹងត្រូវបានដកសិទ្ធិពីការចូលរួមក្នុងការដេញថ្លៃនាពេលអនាគត។

ការបើកចំហ និងបង្កើតទំនាក់ទំនងដោយស្មោះត្រង់ជាមួយអតិថិជនគឺជាការចាំបាច់។ ជួយឱ្យអតិថិជនរបស់អ្នកធ្វើបច្ចុប្បន្នភាពអំពីរបៀបដែលអ្នកកំពុងប្រតិបត្តិផ្ទុយនឹងលក្ខខណ្ឌនៃកិច្ចសន្យា។ ត្រៀមលក្ខណៈដើម្បីឆ្លើយតបទៅនឹងបញ្ហា ដែលមិនរំពឹងទុកដែលអាចប៉ះពាល់ដល់ការអនុវត្តន៍គម្រោង ការផ្តល់សេវាកម្ម ឬការដឹកជញ្ជូនទំនិញ (លក្ខខណ្ឌអាកាសធាតុ ការផ្លាស់ប្តូរនយោបាយ សមាជិកក្រុមដែលឈឺ ព័ត៌មានចាំបាច់ពីអ្នកផ្គត់ផ្គង់របស់អ្នកដែលនាំអោយមានការពន្យារពេល ជាដើម) និងមានផែនការកាត់បន្ថយ ដើម្បីដោះស្រាយបញ្ហាណាមួយឱ្យបានឆាប់តាមដែលអាចធ្វើទៅបាន។ ពិភាក្សា និងស្វែងរកកិច្ចព្រមព្រៀងជាមួយអតិថិជនរបស់អ្នកក្នុងករណីមានតំរូវការចាំបាច់ ដើម្បីធ្វើការកែតម្រូវលើពេលវេលា គំរោងថវិកា ឬវិសាលភាពនៃគម្រោងដែលបានចែង។ ធ្វើឱ្យប្រាកដថាអតិថិជនរបស់អ្នក យល់ថាអ្នកកំពុងធ្វើអ្វីគ្រប់យ៉ាងដែលអ្នកអាចធ្វើបានដើម្បីឱ្យទាន់ពេលវេលា តាមថវិកា និងបំពេញតាមវិសាលភាពទាំងនោះ។

ជាចុងក្រោយ សូមកុំរង់ចាំការបង់ប្រាក់ពេញលេញរហូតទាល់តែអ្នកបានបំពេញកាតព្វកិច្ចទាំងឡាយដែលមានក្នុងកិច្ចសន្យា ហើយអតិថិជនបានទទួលយកការផ្គត់ផ្គង់ចែកចាយពីគម្រោងនោះ។ កិច្ចសន្យាមិនអាចត្រូវបានចាត់ទុកថាបញ្ចប់ជាផ្លូវការទេ រហូតដល់ពេលនោះ។ ខណៈដែលគម្រោងនេះត្រូវបានបិទបញ្ចប់ សូមចងចាំថាត្រូវសួរទៅកាន់អតិថិជនរបស់អ្នកនូវឯកសារយោង ឬវិញ្ញាបនប័ត្របញ្ចប់ការងារ។ ធ្វើបែបនេះ វានឹងជួយជាប្រយោជន៍ក្នុងការចូលរួមដេញថ្លៃនាពេលអនាគត។

ជំហានទី ៤. វាយតំលៃការអនុវត្តន៍ដោយខ្លួនឯង

ទីផ្សារលទ្ធកម្មគឺជាទីផ្សារដែលមានការប្រកួតប្រជែងខ្ពស់​ ហើយក្រុមហ៊ុនត្រូវបន្តធ្វើឱ្យប្រសើរឡើងនូវដំណើរការរបស់ពួកគេដើម្បីទទួលជោគជ័យ។ នៅពេលកិច្ចសន្យាត្រូវបានបិទសមាជិកក្រុមគួរតែពិនិត្យឡើងវិញនូវលក្ខខណ្ឌនានានៃកិច្ចសន្យា ក្រោយចប់កិច្ចសន្យា និងពិភាក្សាអំពីអ្វីដែលបានដំណើរការល្អ អ្វីដែលមិនបានធ្វើ អ្វីដែលអាចកែលម្អ និងមេរៀនដែលបានរៀនពីគម្រោងនោះ។ វិធីនេះនឹងជួយអ្នកឱ្យបានប្រសើរឡើងនូវការផ្តល់គម្រោងនាពេលអនាគតជាមួយអង្គការស្ថាប័ននេះ និងអតិថិជនផ្សេងទៀត។

វាក៏ជាការសំខាន់ផងដែរក្នុងការស្នើសុំមតិយោបល់កែលំអរបស់អតិថិជន។ ធ្វើបែបនេះនឹងជួយឱ្យអ្នកយល់កាន់តែច្បាស់ថា តើអតិថិជនមានការពេញចិត្តនឹងក្រុមហ៊ុនរបស់អ្នក និងទំនិញនានា ការងារ ឬសេវាកម្មដែលយើងបានផ្តល់ឱ្យឬទេ។ ការតាមដានជាមួយអតិថិជនក៏នឹងជួយអ្នកឲ្យវាយតំលៃពីលទ្ធភាពនៃការធ្វើការជាមួយអង្គការស្ថាប័ននោះម្តងទៀត និងរបៀបដែលតម្រូវការនាពេលអនាគតអាចកើតឡើងជាទៀងទាត់។

អ្នកក៏គួរតែបង្កើតយន្តការពិនិត្យឡើងវិញ​ ដើម្បីតាមដានការដេញថ្លៃដែលជោគជ័យនិងការបរាជ័យ។ វានឹងជួយអ្នកកំណត់អត្តសញ្ញាណថា តើអ្នកកំពុងធ្វើអ្វីតាមរបៀបត្រឹមត្រូវប្រភេទនៃការដេញថ្លៃអ្វីដែលអ្នកទទួលបានជោគជ័យជាងមុន នៅកន្លែងណា និងនៅពេលណាវាមានតម្លៃធនធានក្នុងការវិនិយោគ។ ជាមួយនឹងពេលវេលា និងបទពិសោធន៏អ្នកនឹងមានជម្រើសកាន់តែច្រើនជាមួយនឹងការដេញថ្លៃដែលអ្នកបានស្នើសុំដើម្បីបង្កើនឱកាសនៃភាពជោគជ័យរបស់អ្នក។ ការវាយតម្លៃដោយខ្លួនឯងនៃការអនុវត្តន៍របស់អ្នកគឺជាជំហានដ៏សំខាន់បំផុតនៅក្នុងដំណើរការសិក្សា។